Sərhəddə narkotik əməliyyatı: Türkiyəli kuryer "Sarpi"də saxlanılıb

Gürcüstan-Türkiyə sərhədində narkotik vasitələrin qanunsuz dövriyyəsinə və ölkəyə gətirilməsinə qarşı növbəti uğurlu əməliyyat keçirilib.

Xeber.ge xəbər verir ki, "Sarpi" gömrük-keçid məntəqəsində Türkiyə Respublikasının vətəndaşı saxlanılıb.

Gürcüstan Daxili İşlər Nazirliyinin Mərkəzi Kriminal Polis Departamentinin Acarıstan Baş İdarəsi və Maliyyə Nazirliyinin Gömrük Departamenti əməkdaşlarının birgə keçirdiyi əməliyyatın təfərrüatları aşağıdakı kimidir:

Şübhəli şəxs sərhədi keçməyə çalışarkən gömrük nəzarəti zonasında saxlanılıb.

Təqsirləndirilən şəxsin üzərinə keçirilən baxış zamanı külli və xüsusilə külli miqdarda müxtəlif növ narkotik vasitələr və psixotrop maddələr, o cümlədən "Preqabalin" və "Kokain" aşkar edilərək maddi sübut kimi götürülüb.

Saxlanılan şəxs narkotik vasitələrin qanunsuz əldə edilməsi, saxlanılması və Gürcüstan ərazisinə qanunsuz gətirilməsində ittiham olunur.

Faktla bağlı Gürcüstan Cinayət Məcəlləsinin 260, 261, 262 və 263-cü maddələri ilə istintaq başladılıb. Bu maddələr üzrə təqsirləndirilən şəxsi 12 ilədək müddətə azadlıqdan məhrumetmə cəzası gözləyir.

Hazırda istintaq qrupu narkotik vasitələrin mənşəyini və digər mümkün əlaqəli şəxsləri müəyyənləşdirmək üçün araşdırmaları davam etdirir.