Plastik qablarla bağlı qadağa sərtləşir

Gürcüstan hökuməti ərzaq üçün nəzərdə tutulmuş plastik məhsulların istehsalı, idxalı və satışına qoyulan qadağaların icrasına nəzarəti gücləndirir.

Xeber.ge xəbər verir ki, bu məqsədlə İnzibati Xətalar Məcəlləsinə yeni cərimələr

tətbiq edilir.

Ətraf Mühitin Mühafizəsi və Kənd Təsərrüfatı Nazirliyi tərəfindən parlamentə təqdim olunan yeni təşəbbüsə əsasən, plastik qablaşdırma ilə bağlı qaydaların pozulması ciddi maliyyə sanksiyaları ilə nəticələnəcək.

Yeni qanunvericiliyə görə cərimə mexanizmi belə olacaq:

İlkin pozuntu: Qadağan olunmuş plastik məhsulların istehsalı, idxalı və ya bazara çıxarılması 1000 lari məbləğində cərimə və məhsulların müsadirəsi ilə nəticələnəcək.

Təkrar pozuntu: Eyni əməlin təkrar törədilməsi halında cərimə 2000 lariyə qədər artırılacaq və yenə də müvafiq məhsulların müsadirəsi həyata keçiriləcək.

Hökumətin izahatında qeyd olunur ki, ərzaqla təmasda olan plastik məhsulların istifadəsi həm ətraf mühit, həm də insan sağlamlığı üçün ciddi risklər yaradır. Bu addımın əsas məqsədi plastik istifadəsini azaltmaq, ekoloji cəhətdən dayanıqlı alternativlərin tətbiqini təşviq etmək və əhalinin sağlamlığını qorumaqdır.

Qeyd edək ki, qanunvericilikdə edilən bu dəyişikliklər ölkənin dayanıqlı inkişaf hədəflərinə uyğunlaşdırılması prosesinin bir hissəsi kimi qiymətləndirilir.