Gürcüstanda son 24 saatda narkotik cinayətləri ilə bağlı 43 nəfər saxlanılıb – VİDEO
Gürcüstan Daxili İşlər Nazirliyi son 24 saat ərzində Tbilisidə və ölkə bölgələrində narkotik vasitələrin satışında, satışa hazırlıqda və satış cəhdində, eləcə də xüsusilə böyük miqdarda narkotik vasitələrin ölkəyə gətirilməsi və əldə olunub saxlanılmasında ittiham olunan 43 nəfəri saxlayıb.
Bu barədə Gürcüstan Daxili İşlər Naziri Qeka Qeladze keçirdiyi brifinqdə deyib.
Qeladze brifinqdə bildirib ki, saxlanılanlar arasında həm Gürcüstan, həm də digər ölkələrin vətəndaşları var.
“Mən cəmiyyətə Tbilisi və regionlarda narkotiklərin qanunsuz dövriyyəsinə qarşı keçirilmiş daha bir polis tədbiri barədə məlumat vermək istəyirəm. Bu tədbir çərçivəsində narkotiklərin satışı, satışa hazırlıq, satış cəhdi, eləcə də xüsusilə böyük miqdarda narkotik vasitələrin Gürcüstana gətirilməsi və əldə olunub saxlanılmasında şübhəli bilinən 43 nəfər saxlanılıb. Onların arasında Gürcüstan və xarici ölkə vətəndaşları var.
Ölkə üzrə keçirilmiş əməliyyat və istintaq tədbirləri nəticəsində saxlanılanların göstərdiyi ünvanlardan, eləcə də şəxsi axtarışlar, nəqliyyat vasitələri və yaşayış evlərinin yoxlanılması zamanı sübut kimi çoxlu və xüsusilə böyük miqdarda narkotik vasitələr götürülüb.
Bu cinayətlər 20 ilədək və ya ömürlük azadlıqdan məhrumetmə cəzasını nəzərdə tutur.
İstintaqla müəyyən edilib ki, saxlanılan şəxslər narkotiklərin satışını müxtəlif internet tətbiqləri, sosial şəbəkələr, eləcə də birbaşa əlbəəl ötürmə yolu ilə həyata keçiriblər.
Polis, məhkəmə qərarı əsasında, saxlanılan şəxslərdən narkotik vasitələrin bir neçə dəfə nəzarətli alqısını həyata keçirib və bu proseslər audio-video qeydə alınıb.
Daxili İşlər Nazirliyi və ona tabe olan polis strukturlarının əməkdaşları ölkə miqyasında narkotiklərin qanunsuz dövriyyəsinə qarşı mübarizəni 24 saatlıq intensiv rejimdə davam etdirir və narkosatıcıların müəyyən olunması üçün kompleks tədbirlər həyata keçirir. Bu işə görə hər bir əməkdaşa təşəkkür edirəm,” – deyə daxili işlər naziri bəyan edib.
mənbə: interpress
