Gürcüstan Milli Bankı xarici valyutada kredit limitini 1 milyon lariyə qaldırır

Gürcüstan Milli Bankının (GMB) Maliyyə Sabitliyi Komitəsi ölkənin maliyyə sistemində dedollarizasiya prosesini dəstəkləmək və riskləri tənzimləmək məqsədilə yeni qərarlar qəbul edib.

Xeber.ge xeber  verir ki, əsas dəyişiklik xarici valyutada verilən kreditlərlə bağlıdır:

Hedcinq olunmamış (məzənnə riskindən sığortalanmamış) xarici valyuta kreditləri üzrə mövcud 750 000 lari həddi 1 000 000 lariyə qədər artırılıb.

Bu dəyişiklik 2026-cı il iyulun 1-dən etibarən qüvvəyə minəcək.

  Milli Bank qlobal maliyyə şərtlərindəki dəyişiklikləri nəzərə alaraq bəzi yumşaldılmalara gedib. Bildirilib ki, Yaxın Şərqdəki münaqişələr fonunda artan qeyri-müəyyənlik və qlobal inflyasiya gözləntiləri riskləri artırsa da, Gürcüstanın maliyyə sistemi dayanıqlılığını qoruyur.

Komitə xarici valyuta öhdəlikləri üzrə müvəqqəti artırılmış ehtiyat normasının yuxarı həddini yenidən əvvəlki səviyyəsinə qaytarıb və 5 faiz bəndi azaldıb.

Bu alət gələcəkdə də makroiqtisadi mühitə uyğun olaraq tənzimlənəcək.

  GMB vurğulayır ki, maliyyə dollarlaşmasından qaynaqlanan risklərin azaldılması qurumun prioritet vəzifəsi olaraq qalır.

Milli Bank sənaye ilə koordinasiyalı şəkildə uzunmüddətli dedollarizasiya planının icrasını davam etdirəcəyini bəyan edib.

Məlumata görə, Maliyyə Sabitliyi Komitəsinin növbəti iclası 2026-cı il sentyabrın 30-da keçiriləcək.