Forbes milyarderlər indeksində İvanişvilinin sərvəti 2,7 milyard dollara qədər azalıb
Amerikanın Forbes jurnalının milyarderlər indeksində 2025-ci il aprelin 1-də yenilənmiş məlumata görə, Bidzina İvanişvili və ailəsinin sərvəti əvvəlki ilki 4,9 milyard dollardan 2,7 milyard dollara qədər azalıb.
2024-cü ildə Forbes İvanişvilinin sərvətini 4,9 milyard dollar olaraq göstərmişdi. 2025-ci il aprelin 1-də edilən dəyişikliklərdən sonra isə onun sərvəti 2,7 milyard dollar kimi qeyd edilib.
Jurnal bu azalmanın səbəblərini izah etmir. Redaktor yalnız İvanişvilinin ümumi bioqrafiyasına toxunur – onun Rusiyada varlanması, Gürcüstanda siyasi karyerası və İsveçrənin “Credit Suisse” bankı ilə məhkəmə çəkişməsi barədə məlumat verir.
Bu məbləğlə İvanişvili dünya milyarderləri siyahısında 1299-cu yeri tutur.
Digər nüfuzlu nəşr – Bloomberg, milyarderlər indeksini dərc edən başqa bir platforma olaraq, İvanişvilinin sərvətini daha yüksək qiymətləndirir.
Bloomberg hesablamalarına görə, İvanişvilinin sərvəti 7,35 milyard dollar təşkil edir. Fevral ayında Bloomberg-in hesablamalarına əsasən, onun sərvəti rekord səviyyəyə – 7,8 milyard dollara çatmışdı.
Müxtəlif nəşrlər fərqli metodologiyalardan istifadə edirlər və bu, digər milyarderlərin sərvətlərində də fərqlərin yaranmasına səbəb olur.
Məsələn, dünyanın ən varlı adamı Elon Musk-ın sərvəti hazırda Forbes tərəfindən 340 milyard dollar, Bloomberg tərəfindən isə 316 milyard dollar olaraq qiymətləndirilir.
mənbə: marneulifm
