Gürcüstanda turizm sektorunda yeni qaydalar

Gürcüstanda turizm fəaliyyəti ilə məşğul olan sahibkarlar və fiziki şəxslər üçün yeni hüquqi öhdəliklər müəyyən edilir.

 Xeber.ge xəbər verir ki, ölkənin "Turizm haqqında" qanununa mühüm dəyişikliklər layihəsi hazırlanıb.

Yeni qanun layihəsinə əsasən, turizm fəaliyyətinin bütün subyektləri Gürcüstan Milli Turizm Administrasiyasının xüsusi vahid bazasında qeydiyyatdan keçməli olacaqlar.

Təqdim olunan sənəddə qeyd edilir ki, Gürcüstan ərazisində xidmət göstərən aşağıdakı kateqoriyalar mütləq şəkildə rəsmi qeydiyyatdan keçməlidir:

• Turist bələdçiləri (gidlər);
• Turoperatorlar;
• Turizm agentlikləri.

Qanun layihəsində biznes subyektləri üçün müsbət məqamlar da yer alıb.

Belə ki, Milli Turizm Administrasiyasının məlumat bazasında qeydiyyat cəmi bir dəfə həyata keçiriləcək və bu prosedur üçün dövlət tərəfindən heç bir rüsum tələb olunmayacaq, yəni qeydiyyat tamamilə pulsuz olacaq.

Yeni qanunvericilik aktı həmçinin ölkədə risk ehtiva edən (ekstremal, dağlıq və s.) turizm fəaliyyətlərinin çərçivəsini və təhlükəsizlik qaydalarını da tənzimləyir.

Layihəyə əsasən, riskli turizm xidmətləri göstərən provayderlər və şirkətlər üçün 2026-cı il iyunun 1-dən etibarən məcburi sertifikatlaşdırma prosesi tətbiq olunacaq. Ödənişli olacaq bu sertifikatın dəqiq məbləği və rüsum şərtləri isə hökumətin qəbul edəcəyi müvafiq qanunaltı aktla yaxın vaxtlarda müəyyən ediləcək.

Ekspertlərin fikrincə, bu islahat ölkədə xidmət keyfiyyətinin artırılmasına və xarici turistlərin təhlükəsizliyinin daha etibarlı təmin olunmasına xidmət edəcək.