Gürcüstanda Diplomatiya Akademiyası yaradılır

Gürcüstanda diplomatik xidmət üçün yüksəkixtisaslı kadrların hazırlanması məqsədilə Diplomatiya Akademiyası təsis edilir.

 Xeber.ge xəbər verir ki, bu barədə Baş nazir İrakli Kobaxidze hökumətin iclasında bəyanat verib.

Baş nazir qeyd edib ki, yeni yaradılan akademiya müvafiq dövlət qurumunun tabeliyində fəaliyyət göstərən xüsusi təhsil müəssisəsi olacaq.

İ. Kobaxidzenin sözlərinə görə, hazırda dövlət və özəl universitetlərin müvafiq fakültələri gələcək diplomatlar üçün zəruri olan bilik və bacarıqların ötürülməsini lazımi səviyyədə təmin edə bilmir.

Diplomatiya Akademiyası Müdafiə Akademiyası, DİN Akademiyası və Dövlət Təhlükəsizliyi Akademiyası kimi uğurlu idarəetmə modelinə əsaslanacaq. Bu struktur təhsil və tədqiqatın yüksək keyfiyyətinə zəmanət verəcək.

Akademiyanın əsas vəzifəsi ölkənin xarici siyasi mövqelərinin möhkəmləndirilməsi üçün peşəkar kadr korpusu formalaşdırmaqdır.

Bildirilib ki, Diplomatiya Akademiyası müvafiq avtorizasiya prosesindən keçdikdən sonra gələn ildən etibarən tam fəaliyyətə başlayacaq.

Hökumət rəhbəri bu addımın Gürcüstanın beynəlxalq arenada təmsilçiliyini yeni keyfiyyət mərhələsinə çıxaracağına əminliyini ifadə edib.