Yeni tədris ilindən təqaüdlər demək olar ki, ikiqat artırılır

Tbilisi Meriyası paytaxtda təhsil alan gənclər üçün mühüm yenilikləri elan edib. Yeni tədris ilindən etibarən uğurlu magistrantların aldığı semestrlik təqaüdün məbləği əhəmiyyətli dərəcədə artırılacaq.

XEBER.GE  xəbər verir ki, bələdiyyənin qərarına əsasən, əlaçı magistrantlar artıq hər semestr 562 lari deyil, 1000 lari təqaüd alacaqlar. Təqaüdün verilməsi üçün əsas şərtlər isə dəyişməz qalıb:

Tələbə Tbilisi qeydiyyatında olmalıdır.

Semestr ərzində keçilən bütün mühazirə kurslarından 91-dən yuxarı bal (A bəndi) toplamalıdır.

Daha əvvəl bu təqaüdü alan magistrantlar bildiriblər ki, məbləğin artırılması tələbələr arasında təhsil motivasiyasını daha da yüksəldəcək.

Təqaüdlərin artırılması mərkəzi hökumətin qəbul etdiyi yeni qərar sayəsində mümkün olub. Belə ki, payız semestrindən etibarən həssas qruplardan olan birinci kurs tələbələrinin təhsil haqlarını Tbilisi Meriyası deyil, tamamilə dövlət büdcəsi qarşılayacaq. Bununla da meriyanın büdcəsində boşalan vəsait bütövlükdə tələbə qrantlarına və təqaüdlərinə yönəldilib.

Həmçinin qeyd olunub ki, bakalavr pilləsində meriyadan maliyyə yardımı alan tələbələrin dəstəklənməsi təhsillərini başa vurana qədər davam edəcək. Cari ildə bu istiqamətdə:

1175 sosial müdafiəyə ehtiyacı olan tələbə,

376 çoxuşaqlı ailə üzvü,

376 əlilliyi olan (ŞŞM) şəxs təhsil maliyyəsi alıb.

Tbilisi Meriyasının Mədəniyyət, İdman və Təhsil Xidməti gənclər üçün büdcəsi yarım milyon lariyə yaxın (500 000 lari) olan yeni layihə üzərində işləyir. "Tbilisi üçün Gənc Alimlər" adlanan bu proqram çərçivəsində paytaxtın infrastruktur, ekologiya və digər problemlərinin həlli, eləcə də innovativ ideyaların işlənib hazırlanması ilə məşğul olan tələbələrə tədqiqat qrantları ayrılacaq.

Meriyadan bildirilib ki, 2015-ci ildən bəri icra olunan bu proqramların əsas məqsədi maliyyə maneələrini azaltmaq, təhsilin əlçatanlığını artırmaq və paytaxt gənclərinin peşəkar inkişafına dəstək olmaqdır.

Eyni zamanda, meriyanın minlərlə vətəndaşın qısa müddətdə 100-ə yaxın aktual ixtisas üzrə peşə təhsili alaraq işlə təmin olunmasına şərait yaradan məşhur "Öyrən və İşlə təmin olun" layihəsi də uğurla davam etdirilir.