Tbilisidə Avtomobil "Wolt" kuryerini vurdu

Tbilisidə, Universitet küçəsində bir qədər əvvəl baş vermiş yol-nəqliyyat hadisəsindən acı xəbər daxil olub.

 Xeber.ge  xəbər verir ki, minik avtomobili ilə mopedin toqquşması nəticəsində yaranan ağır qəza kuryerin ölümü ilə nəticələnib.

Yayılan son məlumatlara görə, yüksək sürətlə hərəkət edən minik avtomobili onlayn çatdırılma kuryerinin idarə etdiyi mopedlə bərk toqquşub.

Zərbə o qədər güclü olub ki, ağır bədən xəsarətləri alan gənc moped sürücüsü həkimlərin müdaxiləsinə imkan qalmadan, hadisə yerindəcə dünyasını dəyişib.

Hazırda hadisə yerində hüquq-mühafizə orqanlarının əməkdaşları, kriminalistlər və təcili tibbi yardım briqadaları fəaliyyət göstərir.

Universitet küçəsinin sözügedən hissəsində hərəkət qismən məhdudlaşdırılıb.

Polis əməkdaşları qəzaya səbəb olan avtomobil sürücüsünün dindirilməsi və hadisənin dəqiq başvermə mexanizminin müəyyən edilməsi istiqamətində iş aparır.

 Faktla bağlı Gürcüstan Cinayət Məcəlləsinin müvafiq maddəsi ilə ölümə səbəb olma ittihamı üzrə rəsmi istintaq başladılıb.