Şübhəmiz var ki, bu mesaj "dərin dövlətdən" gəlirdi
“Gürcü Arzusu” hökumətinin başçısı İrakli Kobaxidze bildirib ki, ABŞ səfirliyinin rəsmi açıqlamasında ABŞ dövlət katibinin müavini Marko Rubioya
məxsus olduğu deyilən və milyarder sabiq baş nazir Bidzina İvanişviliyə ünvanlandığı bildirilən məktubun “haradan gəldiyini” hökumət əvvəlcə bilməyib. Kobaxidze bu məktubu da "dərin dövlətlə" əlaqələndirib — əvvəllər "qlobal müharibə partiyası" adlandırdığı qurumla. Bu anlayış o dövrdə Donald Tramp prezident olmamışdan əvvəl tez-tez işlədilirdi.
Kobaxidze 21 iyulda “Rustavi 2” televiziyasında deyib:
“Amerika mesajına gəlincə – biz dəqiq bilmirik bu məktub hansı ünvanlardan gəlirdi. Xanım Daniqanın konkret dairələrlə birbaşa əlaqələrini nəzərə alaraq, şübhəmiz var ki, bu məktub Dövlət Departamentinin həmin bölməsindən gəlirdi ki, o da hələ də ‘dərin dövlətin’ təsiri altındadır.”
Səfir Daniqan nə dedi?
• ABŞ-ın Gürcüstandakı səfiri Robin Daniqan 3 iyulda “Azadlıq Radiosu”na verdiyi eksklüziv müsahibədə bildirib ki, "Gürcü Arzusu" rəhbərliyinin məktubuna cavab olaraq dövlət katibi Marko Rubiodan məktub aldığını və bu cavabı şəxsən Bidzina İvanişviliyə çatdırmaq istədiyini bildirmişdi.
• Daniqan deyib ki, bu mesajı şəxsən çatdırmağı ona Rubio tapşırmışdı, lakin İvanişvili görüşdən imtina edib. Bu, Daniqanın Gürcüstandan getməzdən əvvəl verdiyi son müsahibə olub.
• “Biz qapalı məktuba cavabı müzakirə etdiyimiz bir vaxtda, baş nazir açıq məktub paylaşdı. Mən isə baş nazirə yaxınlaşdım və dedim ki, Marko Rubiodan cavab məktubu var, o istəyir ki, bunu Bidzina İvanişviliyə çatdırım. Amma o, görüşdən imtina etdi,” – deyə Daniqan bildirmişdi.
Kobaxidze: “İvanişviliyə verilməsi planlaşdırılan mesaj şantaj məqsədi daşıyırdı”
Kobaxidze iddia edir ki, məktubun məhz İvanişviliyə ünvanlanması onun “şantaj vəziyyətində” olmasından qaynaqlanır:
“Cənab Bidzina İvanişvili şantaj altındadır. Baş nazir isə deyil. Bizim məntiqimizlə, dərin dövlətin nümayəndələri bu məktubu məhz şantaj altındakı şəxsə vermək istəyirdilər. Başqa izahı yoxdur.”
O əlavə edib ki, əgər səfir Daniqan onunla görüşsəydi, bu mesaj hər halda İvanişviliyə çatacaqdı:
“Əgər sən məktubu hakimiyyətin liderlərinə, o cümlədən İvanişviliyə çatdırmaq istəyirsənsə, baş nazir, xarici işlər naziri və ya hər hansı digər yüksək vəzifəli şəxslə görüşə bilərdin. Onlar nə formal, nə də qeyri-formal sanksiyalar altındadır. Amma məqsəd məhz sanksiya altında olan şəxsə – İvanişviliyə bu mesajı vermək idi, bu da ‘dərin dövlətin’, yoxsa ABŞ-ın yox, məhz onların məqsədi idi,” – deyə Kobaxidze vurğulayıb.
ABŞ-ın İvanişviliyə sanksiyaları və Dövlət Departamentinin reaksiyası
ABŞ Maliyyə Nazirliyi 27 dekabr 2024-cü ildə Bidzina İvanişviliyə – "Gürcü Arzusu"nun qurucusuna və fəxri sədrinə – sanksiya tətbiq edib. Sanksiyalar onun Credit Suisse bankı ilə olan mübahisəsini də əhatə edib.
Dövlət Departamenti açıqlamasında deyib:
“İvanişvilinin rəhbərliyi altında ‘Gürcü Arzusu’ Kreml maraqlarını irəli aparıb və Gürcüstanı Avroatlantik trayektoriyadan çıxarıb. Bu, Gürcüstan Konstitusiyasına və gürcü xalqının iradəsinə ziddir.”
O vaxtkı dövlət katibi Entoni Blinken isə bildirib:
“İvanişvili və ‘Gürcü Arzusu’nun fəaliyyəti demokratiya institutlarının zəifləməsinə, insan hüquqlarının pozulmasına və fundamental azadlıqların məhdudlaşdırılmasına səbəb olub.”
Kobaxidze: “Çox mühüm hadisə baş verdi”
Jurnalistin “İndi ABŞ ilə münasibətləri necə normallaşdırmağı planlaşdırırsınız?” sualına cavab olaraq, Kobaxidze deyib:
“Cənab İvanişvilinin görüşdən imtinasından sonra çox mühüm hadisə baş verdi: ABŞ səfiri bir gündə vəzifədən getdi, və həmin gün Gürcüstan səfirinin Vaşinqtona təyin olunması üçün razılıq aldıq. Bu, nümayişkaranə bir jest idi.”
• "Gürcü Arzusu" 10 iyunda elan etdi ki, ABŞ administrasiyası Tamar Taliaşvilinin səfir kimi təyinatını qəbul edib.
• Robin Daniqan isə 7 iyunda şəxsi qərarı ilə vəzifəsini tərk etdiyini açıqladı və bu mövqeyini bir neçə dəfə vurğulamışdı.
• “Azadlıq Radiosu” ilə müsahibəsində Daniqan deyib ki, ABŞ hökuməti Gürcüstandan ilk növbədə “anti-Amerika ritorikasına son verməyi” gözləyir:
“ABŞ barədə deyilənlər doğru deyil. ‘Gürcü Arzusu’ ABŞ haqqında bir çox yalanlar yayır: guya burada ikinci cəbhə açmaq istəmişik – bu doğru deyil; guya mənim sələfim çevriliş təşkil etmək istəyib – doğru deyil; guya ABŞ-Gürcüstan strateji tərəfdaşlığı kağız üzərindədir – bu da doğru deyil; guya hökumətim məni geri çağırıb – bu da yalandır. Siyahını uzatmaq olar,” – deyə səfir bildirib.
• Dövlət Departamentinin sözçüsü Tami Brüs isə 12 iyunda Globalnews-a deyib:
“Robin Daniqanın ABŞ-a 33 illik xidmətinə görə təşəkkür edirik. Biz Gürcüstana yanaşmamızı Amerika maraqlarını qorumaq üçün yenidən qiymətləndirəcəyik. ABŞ Gürcüstan hökumətinə aydın şəkildə bildirmişdir ki, münasibətləri yaxşılaşdırmaq istəyirsə, hansı addımları atmalıdır.”
Səfir Daniqan 15 iyulda Gürcüstandan rəsmi şəkildə vidalaşıb. 3 iyulda “Azadlıq Radiosu”na verdiyi müsahibədə o, “Gürcü Arzusu” rəhbərliyi ilə əlaqələrdən danışıb. “Bəs niyə məktub İvanişviliyə, amma Kobaxidzeyə yox?” – sualına isə belə cavab verib:
“Düşünürəm ki, dünyanın əksər insanları bilir ki, hökuməti faktiki olaraq Bidzina İvanişvili idarə edir.”
mənbə: marneulifm
