Rustavidə mənzil fırıldaqçılığı

Gürcüstan Baş Prokurorluğu qrup halında 102 850 lari vəsaiti dələduzluq yolu ilə mənimsəmək faktı üzrə iki nəfərə qarşı rəsmi ittiham irəli sürüb.

XEBER.GE xəbər verir ki, prokurorluq qanunla müəyyən edilmiş müddətdə təqsirləndirilən şəxslər barəsində həbs qətimkan tədbirinin seçilməsi vəsatəti ilə məhkəməyə müraciət edəcək.

 Gürcüstan Daxili İşlər Nazirliyi tərəfindən aparılan istintaqla müəyyən edilib ki, hadisə Rustavi şəhərində baş verib. Təqsirləndirilən şəxslər zərərçəkmiş vətəndaşı tam tikilib başa çatmış yaşayış binasında mənzil satdıqlarına inandıraraq yalan məlumat veriblər.

İnandırıcılığı artırmaq üçün fırıldaqçılar alıcıya tamamilə başqa bir hazır mənzilin şəkillərini göndəriblər. Reallıqda isə onlar vətəndaşa hələ tikintisi başa çatmamış (yarımçıq) binada yerləşən mənzili satıblar. Bu cinayətkar əməllə hər iki şəxs vətəndaşın külli miqdarda — 102 850 lari pulunu dələduzluq yolu ilə ələ keçirib.

 Saxlanılan şəxslərə qarşı Gürcüstan Cinayət Məcəlləsinin 180-ci maddəsinin ikinci hissəsinin "a" bəndi və üçüncü hissəsinin "b" bəndi (qabaqcadan əlbir olan bir qrup şəxs tərəfindən külli miqdarda törədilən dələduzluq) ilə ittiham irəli sürülüb.

Prokurorluğun rəsmi bəyanatında qeyd olunur ki, bu maddə cəza növü olaraq 9 ilədək müddətə azadlıqdan məhrumetmə məsuliyyəti nəzərdə tutur.