Bir qucaqlama ilə bacısını ölümün pəncəsindən alan əkizlər

Dünyada elə hadisələr var ki, elm və tibb qanunlarını alt-üst edərək insanlığa sevginin və doğmalıq bağının gücünü sübut edir.

  "Maraqlı dünya" rubrikası bu gün oxucularına bir vaxtlar dünya mətbuatının gündəmini zəbt etmiş və bu günə qədər tibb tarixinin ən emosional hadisələrindən biri hesab olunan əkiz bacılar - Kairi və Briel Ceksonların hekayəsini təqdim edir.

Hadisə 1995-ci ildə ABŞ-da baş verib. Əkiz bacılar vaxtından tam 12 həftə tez dünyaya göz açıblar.

Doğularkən hər iki körpənin çəkisi cəmi 1 kiloqram civarında idi. Həkimlər onların yaşamaq şansının demək olar ki, sıfıra bərabər olduğunu bildirirdilər.

Xəstəxana qaydalarına uyğun olaraq, yoluxma riskini azaltmaq məqsədilə vaxtından əvvəl doğulmuş körpələr reanimasiya şöbəsində, fərqli küvezlərdə tək-tək yerləşdirildilər.

Zaman keçdikcə Brielin vəziyyəti nisbətən sabitləşdi və o, çəki toplamağa başladı. Lakin digər bacı - Kairinin səhhəti kəskin pisləşirdi. Həkimlər artıq ümidlərini tamamilə itirmək üzrə idilər.

Doğuşdan bir neçə həftə sonra xəstəxanada dramatik bir gecə yaşandı. Bu dəfə stabil olan Briel qəfildən şiddətlə ağlamağa başladı, nəfəs alması çətinləşdi və bədəni göyərməyə başladı. Növbətçi tibb bacısı Qeyl Kasparan körpəni sakitləşdirmək və boğulmadan xilas etmək üçün bütün tibbi üsullara əl atsa da, heç bir nəticə vermədi. Körpə göz görə-görə əldən gedirdi.

Tibb bacısı xəstəxananın ciddi protokollarını və qaydalarını pozaraq riskli, lakin tarixi bir qərar verdi: o, ağlayan Brieli götürüb ölümcül vəziyyətdə olan bacısı Kairinin küvezinə, onun yanına uzatdı.

Məhz həmin an tibb dünyasının bu günə qədər heyranlıqla bəhs etdiyi o "möcüzə" baş verdi: Briel yanına uzadılan kimi dərhal sakitləşdi və instinktiv olaraq balaca qolunu zəifləmiş bacısı Kairinin boynuna ataraq onu qucaqladı.

Bu tarixi an fotoqraf tərəfindən çəkilərək "Xilas edən qucaqlaşma" adı ilə dünya tarixinə düşdü.

Bu qucaqlaşmadan cəmi bir neçə saat sonra möcüzəvi şəkildə Kairinin də ürək döyüntüləri və bədən temperaturu normallaşmağa başladı. Bir neçə gün ərzində Kairinin vəziyyəti o qədər sürətlə yaxşılaşdı ki, o, hətta çəkidə bacısı Brieli də qabaqladı.

 Hər iki körpə tam sağalaraq xəstəxanadan evə buraxıldı. Bu hadisədən sonra dünya tibb tətbiqində əkiz körpələrin eyni küvezdə saxlanması metodu geniş yayılmağa başladı.

Möcüzəvi qucaqlaşmanın üzərindən illər keçib.

Bir vaxtlar yaşayacağına inanılmayan Kairi və Briel Cekson artıq yetkin qızlardır və hazırda universitetdə təhsil alırlar.

Bacılar mətbuata verdikləri açıqlamalarda bir-birlərindən ayrı bir həyat təsəvvür edə bilmədiklərini, aralarındakı telepatik və mənəvi bağın hələ də çox güclü olduğunu bildirirlər. Onların bu hekayəsi bəşəriyyətə qan bağının, bacı-qardaş sevgisinin hər hansı bir tibbi dərmandan daha güclü təsirə malik olduğunu hər zaman xatırladır.