Bidzina İvanişvili London məhkəməsində Credit Suisse bankına qarşı qalib gəldi

Londondakı məhkəmə – Birləşmiş Krallığın dənizaşırı əraziləri (Bermuda, Kayman adaları və s.) üçün ali apellyasiya

instansiyası olan Privy Council – bu gün çıxardığı qərarla Bermudanın aşağı instansiya məhkəməsinin 2022-ci ilin iyununda verdiyi hökmü qüvvədə saxladı. Həmin hökmə əsasən, UBS/Credit Suisse Bidzina İvanişviliyə 607 milyon ABŞ dolları məbləğində kompensasiya ödəməlidir. UBS/Credit Suisse bu qərarı 2024-cü ildə Privy Council-də apellyasiya etmişdi və bu gün məhkəmə son qərarını elan etdi.

Credit Suisse Sinqapurda da uzun illər davam edən məhkəmə prosesində uduzdu və yekun qərarla İvanişvilinin xeyrinə 461 milyon dollar kompensasiya ödəməsi müəyyən olundu.

Qeyd olunmalıdır ki, ABŞ-ın 2024-cü il 27 dekabr tarixində İvanişviliyə tətbiq etdiyi maliyyə sanksiyalarında göstərilir: Sinqapurda qazanılmış məhkəmə işinə görə nəzərdə tutulan 461 milyon dollarlıq kompensasiyanı İvanişvili ABŞ-ın xüsusi icazəsi olmadan ala bilməz. Lakin həmin sənəddə Bermudada (və indi artıq Birləşmiş Krallığın Privy Council instansiyasında) gedən məhkəmə işindən irəli gələn 607 milyon dollarlıq kompensasiyanın ödənilməsi ilə bağlı heç bir məhdudiyyət qeyd olunmayıb. Buna görə də hazırda bu kompensasiyanın faktiki olaraq ödənilib-ödənilməyəcəyi məlum deyil.

Credit Suisse-lə Bermudada məhkəmə münaqişəsi – tarixi:

Məhkəmə işi Bidzina İvanişvilinin və onun ailə üzvlərinin adına yatırılan şəxsi sığorta vəsaitlərinə aiddir. Sənədlərə əsasən, İvanişvili 2011 və 2012-ci illərdə imzalanmış müqavilələrlə Bermuda adalarında Credit Suisse Life ofisinə ümumilikdə 750 milyon dollar depozit tapşırmışdı. Bu vəsait “sığorta haqqı” kimi göstərilir və onun investisiyası və təhlükəsizliyinə bankın özü cavabdeh idi.

2015-ci ildə İvanişvili bu sığorta sxemindən 400 milyon dolların yoxa çıxdığını aşkar etdi. Araşdırmalar göstərdi ki, bu vəsait Credit Suisse-in keçmiş şəxsi bankiri Patrik Leskadro tərəfindən həyata keçirilmiş dələduzluq əməliyyatları nəticəsində mənimsənilib. 2017-ci ildə İvanişvilinin hüquqşünasları Bermudanın məhkəməsinə iddia qaldırdılar.

Patrik Leskadro məhkəmə prosesinin əvvəlindən özünün günahını etiraf etmişdi. O bildirib ki, 2008-ci ildən bəri İvanişvilinin imzasını saxtalaşdırır və onun razılığı olmadan maliyyə əməliyyatları həyata keçirirdi.

Credit Suisse rəhbərliyi dəfələrlə bildirib ki, bank bu illər ərzində baş verən qanun pozuntularından xəbərsiz olub və dələduzluq sxeminin müəllifi yalnız keçmiş bankirdir. Lakin Bermudanın məhkəməsi bu izahatı qəbul etmədi və bankı çoxmilyonluq kompensasiya ödəməyə məcbur etdi.

2023-cü ilin martında Credit Suisse UBS tərəfindən satın alındı. Bu səbəbdən 2023-cü ilin martından sonra İvanişvilinin işlərini UBS davam etdirirdi. Lakin həm Sinqapurda, həm Bermudada, həm də Birləşmiş Krallığın məhkəmə instansiyalarında UBS məhkəməni uduzdu.

Bank artıq kompensasiya üçün nəzərdə tutulmuş vəsaiti xüsusi escrow hesabında yerləşdirib və onun İvanişviliyə verilməsi yalnız yekun qərarın çıxarılmasını gözləyirdi. Lakin ABŞ-ın tətbiq etdiyi sanksiyalara görə Sinqapur məhkəməsinin müəyyən etdiyi məbləğin ödənilməsi üçün ABŞ-ın icazəsi tələb olunur. Eyni məhdudiyyət Bermuda üzrə kompensasiyaya şamil edilmir – çünki sanksiya sənədində bu barədə heç nə qeyd olunmayıb.

mənbə: marneulifm