Baş verən mübahisə bıçaqlanma ilə nəticələndi - Bir vətəndaş və bir polis bıçaqlandı
Kaxeti Polis İdarəsinin əməkdaşları isti izlərlə həyata keçirilən əməliyyat-axtarış və istintaq tədbirlərinin nəticəsində 1999-cu il təvəllüdlü N.R.-ni iki nəfərin ağır bədən xəsarəti almasına səbəb olan hücumda şübhəli bilərək saxlayıblar.
Bu barədə Gürcüstan Daxili İşlər Nazirliyi məlumat yayıb.
Rəsmi məlumata görə, Qvarelidə baş verən mübahisə zəminində N.R. 1984-cü il təvəllüdlü R.M.-ə soyuq silahla çoxsaylı bədən xəsarətləri yetirib. Hadisəyə şahid olan və münaqişəni sakitləşdirməyə çalışan Kaxeti Polis İdarəsinin detektivlər şöbəsinin əməkdaşı, 1983-cü il təvəllüdlü E.M. də N.R. tərəfindən bıçaqlanıb.
Yaralılar xəstəxanaya çatdırılıb və onlara müvafiq tibbi yardım göstərilib. Polis hadisə zamanı istifadə olunan bıçağı maddi sübut kimi götürüb.
Cinayət Məcəlləsinin 117-ci maddəsinin 3-cü hissəsi ilə – iki nəfərə qəsdən ağır bədən xəsarəti yetirmə faktı üzrə istintaq aparılır. Bu maddə 13 ilədək azadlıqdan məhrumetmə cəzasını nəzərdə tutur.
mənbə: interpress
