Atəşkəs elan olunduqdan sonra 350-dən çox şəhid

Qəzza Səhiyyə Nazirliyi atəşkəs elan olunduqdan sonra Qəzzadakı qurbanlarla bağlı yeni statistika yayıb və eyni zamanda, Mülki Müdafiə İdarəsi davam edən mühasirə səbəbilə fəaliyyətlərinin dayanması barədə xəbərdarlıq edib.

Xeber.ge xəbər verir ki, Qəzza Səhiyyə Nazirliyinin bildirdiyinə əsasən, son 24 saat ərzində 14 şəhid (5 yeni və 9 nəfər dağıntılar altından çıxarılan) Qəzza xəstəxanalarına gətirilib.

Nazirlik açıqlayıb ki, 11 oktyabr 2025-ci ildə atəşkəsin başlamasından indiyədək 352 nəfər şəhid olub, 896 nəfər yaralanıb və 605 cəsəd dağıntılar altından çıxarılıb. Həmçinin bildirilib ki, 7 oktyabr 2023-dən indiyədək müharibənin ümumi qurbanlarının sayı 69 min 799 şəhid və 170 min 972 yaralıya çatıb.

Qəzza Səhiyyə Nazirliyinin gündəlik hesabatında vurğulanıb ki, bəzi qurbanlar hələ də dağıntılar altında və ya küçələrdə qalıb və mövcud şərait səbəbilə tibbi yardım və mülki müdafiə qrupları onlara çata bilmir.

Yanacaq böhranı və mülki müdafiə xidmətlərinin dayanması

Qəzza Mülki Müdafiə İdarəsi bildirib ki, həftələrdir mövcud olan azsaylı avadanlıqları işlətmək üçün ciddi yanacaq çatışmazlığı ilə üz-üzədir. Qurum qeyd edib ki, dəfələrlə müraciət edilməsinə baxmayaraq, BMT-nin Layihə Xidmətləri Ofisi (UNOPS) hələ də kifayət qədər yanacaq əldə edilməsinə mane olan məhdudlaşdırıcı qaydalar tətbiq edir.

Mülki Müdafiə İdarəsinin açıqlamasına görə, qurumun xidmətlərinin 50 faizi faktiki olaraq dayanıb və bu da mülki şəxslərin həyatını təhlükə altında qoyur. Qurum UNOPS-u xidmətlərin dayanmasından yaranan hər cür gecikmə və insan itkisinin tam məsuliyyət daşıyıcısı hesab edib və bütün məhdudiyyətlərin dərhal aradan qaldırılması və tələb olunan yanacağın tam şəkildə təmin edilməsini tələb edib.

mənbə: iqna