Paata Burçulaşvili özünü yaxşı hiss edir və mübarizəni davam etdirmək niyyətindədir

“Rustaveli Prospekti” hərəkatının lideri Paata Burçulaşvilinin vəkili Levan Kavelaşvilinin sözlərinə görə, Burçulaşvili hazırda özünü yaxşı hiss edir və mübarizəni davam etdirməyə hazırdır.

Vəkilin verdiyi məlumata əsasən, o və həmkarı bu gün səhər Dighomi müvəqqəti saxlama təcridxanasında müştərisini ziyarət ediblər.

“Bu səhər mən və həmkarım Paata bəyin yanına getdik. Deyə bilərəm ki, o, özünü yaxşı hiss edir, mənəvi cəhətdən güclüdür və fəxr edir ki, ölkəsinə olan sevgisi naminə oradadır. Ona hələ rəsmi ittiham irəli sürülməyib, buna görə də hazırda konkret olaraq nədə günahlandırıldığını bilmirik. Rəsmi ittiham elan edildikdən sonra daha ətraflı danışa biləcəyik. Əvvəlcə onu klinikadan Mərkəzi Kriminal Polisə, oradan isə təcridxanaya köçürdülər. Sağlamlıq durumu sabitdir, baxmayaraq ki, aksiya zamanı bədən xəsarətləri alıb və yorğundur. Hazırda vəziyyəti yaxşıdır və mübarizəni davam etdirmək əzmindədir”, – deyə Levan Kavelaşvili bildirib.

Xatırladaq ki, Daxili İşlər Nazirliyi “Rustaveli Prospekti” hərəkatının liderləri Paata Burçulaşvili və Murtaz Zodelavanı, həmçinin “Vahid Milli Hərəkat” partiyasının üzvü İrakli Nadiradzeni, “Strategiya Aqmaşenebeli” partiyasının liderlərindən biri Paata Mandjaladzeni və polkovnik Laşa Beridzeni saxlayıb. Onlar 4 oktyabr aksiyasının təşkilat komitəsinin üzvləri olublar.

Nazir müavininin açıqlamasına görə, onlara Gürcüstanın konstitusion quruluşunun zorakı yolla dəyişdirilməsinə və ya dövlət hakimiyyətinin devrilməsinə çağırış, eləcə də qrup halında zorakılığın təşkili, rəhbərliyi və iştirak ittihamları irəli sürülür.

Bu cinayətlərə görə 9 ilədək azadlıqdan məhrumetmə cəzası nəzərdə tutulur.

mənbə: Intrepress.ge