Keçid körpüsündə yanğının səbəbi məlum deyil: satıcılar zərərin ödənilməsini tələb edir-VİDEO

Keçid körpüsündə baş verən yanğının səbəbi hələ də məlum deyil. Ərazidə istintaq tədbirləri başa çatıb, lakin hələlik yanğının nədən qaynaqlandığı və hadisənin qəsdən törədilib-törədilmədiyi barədə cavab yoxdur. Yanğın nəticəsində onlarla mağaza yanıb, minlərlə lari dəyərində mallar məhv olub.

XEBER.GE xeber  verir ki, səhər saatlarından ərazidə zərərçəkən satıcılar olsa da, təhlükəsizlik tədbirləri səbəbindən onların yanmış ticarət obyektlərinə yaxınlaşmasına icazə verilmir. Satıcılar yanğının səbəbinin müəyyənləşdirilməsini və dəymiş ziyanın ödənilməsi məsələsinə aydınlıq gətirilməsini tələb edirlər. Onların sözlərinə görə, yanğından bir qədər əvvəl ərazidəki mağazaların tamamilə sökülməsi və avtomobil yolunun çəkilməsi planlaşdırıldığı barədə söhbətlər olub.

“Uşaqlarıma and olsun, bir parça da götürməmişəm. Bir kisə yarım açılmamış pərdəm qalıb, bir neçə başqa şey də... Çantamda 200 lari var idi, o da orada qaldı... Hələ heç kim gəlməyib”, – deyə satıcılardan biri bildirir.

“Bizim arxamızda duran bir nəfər də yoxdur. Bizi buradan çıxaracaqlar, dağıdıb atacaqlar... 22 köşk yanıb. Dekabra qədər vaxtımız var idi. Dekabra qədər hələ nə qədər vaxt var idi, amma bunu etdilər, bilmirəm... Dekabra qədər qalmalı idik, sonra ‘söküləcək, nələrsə tikiləcək’ deyirdilər”, – başqa bir satıcı söyləyir.

“Dörd mağazam var idi, ikisi yanıb, digər ikisi isə suyun içindədir. Zərərimizi kim ödəyəcək, nə qədər ödəyəcək, işimiz necə olacaq – heç nə bilmirəm. Heç kim yanımıza gəlməyib, heç kim bizimlə danışmayıb. Buradan çıxarılacağımızı deyirdilər, amma bunu əvvəlcədən bildirsəydilər, özümüz gedərdik. Yandırmağa nə ehtiyac var idi? Hansısa layihə var idi, orada banner asılmışdı və bunun baş verəcəyini bilirdik, amma nə vaxt olacağını bilmirdik”, – daha bir satıcı deyir.