Çıxarılan yoldaşlar Siyasi Şuraya qayıtmalıdırlar

Çıxarılan yoldaşlar Siyasi Şuraya qayıtmalıdırlar - Saakaşvili

20 Noyabr 2023 - 17:00

768

Gürcüstanın keçmiş prezidenti Mixeil Saakaşvili “Milli Hərəkat”ın siyasi şurasının koordinasiyasını öz üzərinə götürdüyünü açıqlayıb.

Saakaşvilinin fikrincə, siyasi şuradan çıxarılan insanlar geri qayıtmalıdır.

“Levan Xabeişvili inanılmaz dərəcədə yaxşı işləyir və regional təşkilatlar qurur. Noyabrın 23-də bizim manifest qəbulumuz var. Bütün səhvlərin, əgər edilərsə, aradan qaldırılması çox vacibdir. Siyasi məsuliyyəti öz üzərimə götürürəm ki, ilk növbədə, Siyasi Şuradan nədənsə kənarlaşdırılan bütün təcrübəli mübarizlərimiz və bir çox ləyaqətli insanlar yenidən Siyasi Şuraya qayıtsınlar. Siyasi şuranın koordinasiyasını öz üzərimə götürürəm. Mən rəhbərliyi öz üzərimə götürürəm və onların partiyaya yenidən inteqrasiyasını və partiyanın başqa əlaqələrə açıq olmasını təmin edirəm”, - Mixeil Saakaşvili bildirib.

“Milli Hərəkat”ın siyasi şurasında dəyişikliklər Levan Xabeişvilinin sədr postuna seçilməsindən sonra baş verib. Partiyanın keçmiş sədri Nika Melia, Koba Plutiya və başqaları yeni siyasi şuradan kənarda qalıblar, bəziləri isə şuranı özləri tərk ediblər.

Saakaşilinin fikrincə, “tələsik geri çəkilən” həmin şəxslər Siyasi Şuraya qayıtmalıdırlar. O, konkret soyadların da adını çəkib: Nika Vaçeişvili, Eka Tsamalaşvili, Zurab Melikişvili, Qia Çanturia, Rusiko Tsirekidze, Maiko Cavaxişvili, Merab Canelidze, Koba Xabazi, Koba Plodtia...

Saakaşvili onları Siyasi Şuraya qayıtmağa çağırıb və bildirib ki, bu, hələ də legitim olan Siyasi Şuranı daha da legitim edəcək. Bundan əlavə, Saakaşvili vurğulayıb ki, Levan Xabeişvili və Petre Ciskarişvili qanuni olaraq öz vəzifələrinə seçiliblər.

O, “Milli Hərəkat”da qeyri-rəsmi idarəçiliklə bağlı yayılan xəbərlərə münasibət bildirərək, “Mən zəmanət verəcəm ki, [partiyada] heç kəs sıxışdırılmayacaq və heç kəs kənara çəkilməyəcək”.

“Onlar qeyri-rəsmi idarəçiliyə çağırdıqda, heç kim məni qeyri-rəsmi idarə edə bilməz və əgər söhbət qeyri-rəsmi idarəçiliyimdən gedirsə, mən öz iradəmə zidd olaraq özümü bu şəraitdə tapdım, buna görə də partiya və mübarizə üçün məsuliyyət daşıya bilmirəm”, - Saakaşvili bildirib.

Mixeil Saakaşvili VMH partiyasından baş nazirliyə namizəd kimi irəli sürüləcəyi ilə bağlı yayılan məlumatlara da cavab verib.

“Hələ ki, baş nazir seçilmək tezdir. Bu, bir çox amillərdən asılıdır. Biz daha bir neçə ay vəziyyətə baxmalıyıq, ən çox insan üçün məqbul olan optimal namizədi tapmalıyıq, çünki biz şərəfli ikinci yer üçün deyil, qələbə üçün gedirik. Ən əsası, seçki siyahıları kiminsə sövdələşməsi ilə deyil, aşağıdan yuxarıya doğru hazırlanmalıdır. Partiyanın bütün üzvləri seçki siyahısında olan insanlara səs verməlidir", - Saakaşvili bildirib.

Gürcüstanın keçmiş prezidenti gələcək perspektivlərindən də danışıb və bildirib ki, Gürcüstanda vəziyyət dəyişəndə ilk iş Milli Bankı ləğv etməkdir və Gürcüstan iqtisadiyyatı avroya keçməlidir. Onun sözlərinə görə, Gürcüstan “vahid vergi ölkəsi” olmalıdır. Pensiya yaşından asılı olmayaraq işləməyə davam edənlərin isə pensiyalarına 20% əlavə olmalıdır.