Xəbər.ge : "Kommersant": Rusiya Ermənistana "İsgəndər-E" və Su-30SM-lər göndərməyəcək

Ermənistanın yeni hakimiyyəti tərəfindən sabiq rəhbərliyin təqib olunması rəsmi Moskvanın hiddətinə səbəb olub. Kollektiv Təhlükəsizlik Müqaviləsi Təşkilatının (KTMT) baş katibi Yuri Xaçaturovun məhkəməyə cəlb olunması xüsusilə Moskvanı qəzəbləndirib.   Ordu.az xəbər verir ki, bu barədə "Kommersant" nəşri Rusiya hökumət orqanlarındakı öz mənbələrinə istinadən məlumat verir.   KTMT-yə yaxın olan mənbə "Xaçaturova və təşkilata qarşı hücum cəhdinin bölgədən kənar oyunçuların təşəbbüsü ilə başlamasını" istisna etmədiyini qeyd edib.   Rusiyada Ermənistanın hazırkı rəhbərliyinin hərəkətləri hərbi blokun imicinə zərbə kimi qiymətləndirilib. Moskva hesab edir ki, KTMT-nin baş katibi postuna Ermənistanın təqdim edəcəyi namizəd dəstək ala bilməsə, digər üzv ölkənin - Belarusun vətəndaşı seçiləcək.  "Kommersant" Rusiya hərbi sənayesinin iki rəhbərinə istinad edərək bildirir ki, yaranmış vəziyyət silah tədarükü barədə artıq əldə edilmiş razılaşmalara da mənfi təsir göstərə bilər. Söhbət 100 milyon dollar dəyərində silah tədarükünə dair razılaşmadan gedir. Bu razılaşmaya əsasən digər silahlarla yanaşı, Ermənistan ikinci "İsgəndər-E" komplekslərini və Su-30SM qırıcıları əldə etmək niyyətində idi.

Baxış sayı: 47